شغّل الـ PRD مع الـ AI

الهدف

بعد هالدرس مواصفات المنتج (PRD) مالك مختبر بالضغط، ومقسّم لمهام مرتبة يقدر agent ينفّذ كل وحدة لحالها.

ليش هذا الحين؟

عندك PRD. لو رحت الحين تقول للـ agent "نفّذ هذا" بيطلّع لك 40 ملف بجلسة وحدة، ما راح تفهم ولا وحدة منها، وأول ما يطيح شي ما راح تعرف وين.

الطريقة الصح خطوتين: خلّ الـ AI ينتقد الـ PRD أول، بعدين قسّمه لمهام صغيرة.

الخطوة 1: الناقد

الـ AI ممتاز بكشف الغموض — بس لازم تطلب منه بصراحة، لأن سلوكه الافتراضي هو الموافقة.

استخدم هالـ prompt:

هذا PRD لتطبيق موبايل. لا تكتب كود ولا تقترح features.

مهمتك: اكسره.

1. اطلع كل موضع غامض يجبرك تفترض افتراض. لكل واحد،
   قل شنو بتفترض لو نفّذت اليوم.
2. اطلع كل حالة حدّية غير مغطاة (فارغ، خطأ، بدون إنترنت،
   بيانات كبيرة، صلاحية مرفوضة).
3. اطلع كل شي يخالف قوانين App Store أو Google Play.
4. اطلع كل feature تقدر تنشال بدون ما تنكسر الرحلة الأساسية.

رتّب النتائج بالأهم أول. لا تمدح الوثيقة.

النقطة الأولى هي الذهب. القائمة اللي بترجع لك هي حرفيا القرارات اللي بياخذها الـ AI بدالك لو نفّذت بدون توضيح.

خذ القائمة، وجاوب على أعلى 5 نقاط داخل الـ PRD نفسه. لا تجاوب بالشات — عدّل الوثيقة.

كرر مرتين. الجولة الثانية دايما تطلع أقل، وهذي علامة إن الوثيقة نضجت.

انتبه من الـ scope creep

الـ AI ما يمسك نفسه عن إضافة features. لو رجع لك بـ "يمكن تضيف gamification"، ارجع لقائمة مو بالنسخة الأولى وقول لا.

المعيار الوحيد: هالشي يخدم الرحلة الوحيدة أو لا؟

الخطوة 2: التقسيم

المهمة الزينة للـ agent:

• تنجز بجلسة وحدة — لو أكبر، بتفقد السيطرة
• تنتهي بشي تقدر تشوفه — شاشة تفتح، زر يشتغل، بيانات تنحفظ
• ما تعتمد على مهمة ما خلصت

اطلب التقسيم جذي:

قسّم هالـ PRD لمهام تنفيذ.

قواعد:
- كل مهمة تنتهي بشي أقدر أشغّله وأشوفه بجهازي
- رتّبهم بحيث كل مهمة تبني على اللي قبلها
- لكل مهمة: العنوان، الملفات المتوقعة، ومعيار القبول
- لا تكتب كود
- لو مهمة أكبر من جلسة، قسّمها

الترتيب الصحيح للموبايل

أكو ترتيب يشتغل وهو دايما نفسه:

1. الهيكل والتنقّل — شاشات فاضية، بس التنقّل بينها يشتغل
2. طبقة البيانات — النماذج والتخزين، بدون واجهة حلوة
3. الرحلة الأساسية — من البداية للنتيجة، بأقبح شكل ممكن
4. الحالات الفارغة والأخطاء — قبل التجميل، مو بعده
5. RTL والعربي — راجع كل شاشة باتجاه صح
6. الشكل — الحين جمّل
7. متطلبات الستور — خصوصية، حذف حساب، إفصاح
8. التسييل — جدار الدفع واستعادة المشتريات
9. التحليلات — المقياس الواحد اللي حددته

أكثر غلطة: يبدأون بالخطوة 6. تطلع شاشات حلوة ما ورها بيانات، وبعدين تعيد بناء كل شي.

ليش RTL بخطوة منفصلة

لأنك لو أجّلتها للآخر بتلقى margin-left بخمسين مكان. راجعها بعد ما تشتغل الرحلة وقبل التجميل، وحط بالـ prompt:

راجع كل الشاشات: استخدم بس خصائص منطقية
(start/end, ms/me, ps/pe) بدل left/right.
النصوص الإنجليزية داخل الجمل العربية تنعزل bidi.
الأيقونات الاتجاهية تنعكس.

اكتب المهام بملف

حطهم بـ TASKS.md بالمستودع، مو بالشات. الأسباب:

• الشات ينتهي، الملف يبقى
• تقدر تعطي الـ agent مهمة وحدة بالمرة مع الملف كسياق
• تشوف تقدّمك
• لما ترجع بعد أسبوع، تعرف وين وقفت

أغلاط شائعة

• تعطي الـ agent الـ PRD كامل وتقول "نفّذ": يطلّع كود كثير ما تفهمه
• تقبل أول رد من الناقد: كرر مرتين
• تخلي الـ AI يضيف features: هو مصمم يوافقك ويوسّع. القرار قرارك
• تخلط التخطيط بالتنفيذ: جلسة للتخطيط، جلسة للكود. لا تخلطهم

الخلاصة

PRD مختبر، وTASKS.md مرتّب. المشروع الختامي الجاي يجمع كل شي.